الفرق بين الرؤيـــا والحلم وحديث النفس

**كتكوته** · 06-18-2010, 08:51 PM

الموضوع الذى يهم الجميع ........ الفرق بين الرؤيـــا والحلم وحديث النفس

الفرق بين الرؤيـــــــــا والحـــــــــــلم وحديث النفس
وازاى نقدر نخلى احلامنا الوحشة ماتتحققش

السلام عليكم ورحمة الله وبركاته
النهاردة جايبالكم موضوع يهم الكل ..... اللى طالبة التفسير ..... وكمان اللى بتحاول تفسر

انتوا ماتعرفوش خطورة اللى بتعملوه !!!!!

أنا لاحظت فيه عضوات كتييييير مايعرفوش الفرق بين الرؤيا والكابوس وحديث النفس
وده بيسبب مشاكل كتير من الطرفين

اولا : الاخت اللى طالبة تفسير كابوس ......... وهى فاكره انه رؤية
ثانيا : الاخت اللى داخلة تفسر وتفول على الناس بالمصائب

والمصيبة

انه ممكن يقع التفسير ....... اللى هو كان كابوس
وطبعا الاخت مش همها ........ وفرحانة ان تفسيرها طلع صح

ومش مهم بقا الاخت التانية حصلها مصيبة ولا إيه
مع اننا هنقول برده ان الاخت اللى كاتبه الكابوس برده غلطانة ...... لأنها ماتبعتش كلام النبى فى احاديثه

بداية انا هقولكوا حكاية اتذكرها عن الرسول الكريم عليه الصلاة والسلام
جائته امرأة حامل وزوجها غائب وحكت له حلمها .... بأنها ترى جدار البيت بينهدم ..... وقد فسرها لها النبى صلى الله عليه وسلم على انها ستلد ولد صالح وبأن زوجها سيعود ،
ولكن هذه السيدة تكرر معها هذا الحلم فذهبت به للسيدة عائشة كى تفسره لها ..... ففسرته السيدة عائشة على انها ستلد ولد فاسد وان زوجها سيموت ،
والغريب ان تفسير السيدة عائشة هو اللى تحقق
ولما عرف الرسول بهذا التفسير غضب واجاب السيدة عائشة فيما معناه.. اننا جئنا مبشرين ولسنا منفرين ،

عايزة اسألكوا على حاجة مهمة :
هل معنى كده ان تفسير الرسول خاطئ وتفسير السيدة عائشة هو اللى صح ؟؟؟
وليه الحلم ماتحققش غير لما السيدة عائشة هى اللى فسرته .... ماكان ممكن يتحقق بتفسير الرسول ؟؟
وكان ممكن يتحقق بتفسير السيدة عائشة بس قبل ماتفسره ؟؟
يعنى لازم الاول يتفسر الحلم عشان يتحقق ؟؟؟

انتظرونى
رجعالكم ان شاء الله بباقى الموضوع

**كتكوته** · 06-18-2010, 08:52 PM

بدايةً ..... أنا هقولكوا حديث الرسول عليه الصلاة والسلام
وبعدين هاحكيلكوا

عَنْ عَوْفِ بْنِ مَالِكٍ عَنْ رَسُولِ اللَّهِ صَلَّى اللَّه عَلَيْهِ وَسَلَّمَ قَالَ :
( إِنَّ الرُّؤْيَا ثَلاثٌ :
مِنْهَا أَهَاوِيلُ مِنَ الشَّيْطَانِ لِيَحْزُنَ بِهَا ابْنَ آدَمَ ،
وَمِنْهَا مَا يَهُمُّ بِهِ الرَّجُلُ فِي يَقَظَتِهِ فَيَرَاهُ فِي مَنَامِهِ ،
وَمِنْهَا جُزْءٌ مِنْ سِتَّةٍ وَأَرْبَعِينَ جُزْءًا مِنَ النُّبُوَّةِ )
صحيح سنن ابن ماجه 3155 .

اللى هما إيه ؟؟؟؟
1- الكابوس .... او الحلم من الشيطان
2- حديث النفس
3 - رؤية من الله

معنى كده ان مش كل حلم نحلم بيه يبقى رؤيا وليه تفسير

أوكيههههه ؟؟؟؟؟

طيب ازااى نفرق بينهم ؟؟؟!!

طب هقولكوا الاول برده الحديث ده وبعدين احكيلكوا
عَنْ أَبِي سَعِيدٍ الْخُدْرِيِّ أَنَّهُ سَمِعَ رَسُولَ اللَّهِ صَلَّى اللَّه عَلَيْهِ وَسَلَّمَ يَقُولُ : ( إِذَا رَأَى أَحَدُكُمُ الرُّؤْيَا يُحِبُّهَا فَإِنَّهَا مِنَ اللَّهِ فَلْيَحْمَدِ اللَّهَ عَلَيْهَا وَلْيُحَدِّثْ بِهَا وَإِذَا رَأَى غَيْرَ ذَلِكَ مِمَّا يَكْرَهُ فَإِنَّمَا هِيَ مِنَ الشَّيْطَانِ فَلْيَسْتَعِذْ مِنْ شَرِّهَا وَلا يَذْكُرْهَا لِأَحَدٍ فَإِنَّهَا لَنْ تَضُرَّهُ ) رواه البخاري 7045 .

يعنى الحلم اللى احنا حاسينه حلو وفرحانين بيه ....... يكون رؤية من الله
والحلم الوحش اللى احنا خايفين منه من الشيطان ،

هتقولولى طب وحديث النفس ؟؟

هقولكوا ماتستعجلوش

حديث النفس هو ان الواحد بيفكر فى حاجة كتيييييييييييييير ولما ينام يحلم بيها

زى ايه ؟؟

زى مثلا واحدة عاملة عزومة بعد بكرة ...... ولما نامت
حلمت خير اللهم اجعله خير انها عازمة الناس عندها وعاملة فراخ وبط وام محمد جت وام حسن مكانتشى فاضية

ده باين اووى انه حديث نفس
لأن الست ديه شاغلة نفسها بالعزومة
وطبيعى انها تحلم بيها

انما لو واحدة بقا بتفسر جديد ...... وحبت تفسره
تروح داخلة على تفسير الاحلام
وبعدين تشوف معنى العزومة فى المنام
وطبعا معنى الفراخ والبط
طب وام محمد اللى جت !!

طبعا كده غلط فى غلط
هى تعبت نفسها عالفاضى لأنه حديث نفس وليست رؤيا

انتظرونى
ثوانى ورجعالكم ان شاء الله

**كتكوته** · 06-18-2010, 08:52 PM

نيجى بقا للكابوس
أو الاحلام من الشيطان

وهنا بقا المصيبة

ليه ؟؟؟؟؟

لأن الاخت شافت كابوس وجاية تحكيهولنا عشان نفسرهولها
آل يعنى هى هتستريح لما نقولها عالمصايب اللى هتحصلها ؟!

لأ وفيه كم عضوة كده فرحانة بتفسيراتها اللى مابتنزلش الارض ابدا
تروح داخلة ومفسرهولها
ولا اللى تدخل وتقولها هو معناه وحش ....... بس امرى لله هقوله وخلاص
كأن حد غاصبها على التفسير

بجد بضايق

وانا لما بضايق بتنرفز اوووووى

وبيبقى هاين عليا الغى المشاركة والكابوس ...... وطبعا ده مش بإيدى
بس عشان نستريح بقا

طب لما نحلم بكابوس نعمل ايه ؟؟؟؟؟؟

اقروا الكام حديث دول وبعدين احكيلكوا

عَنْ جَابِرٍ عَنْ رَسُولِ اللَّهِ صَلَّى اللَّه عَلَيْهِ وَسَلَّمَ أَنَّهُ قَالَ : ( إِذَا رَأَى أَحَدُكُمُ الرُّؤْيَا يَكْرَهُهَا فَلْيَبْصُقْ عَنْ يَسَارِهِ ثَلَاثًا وَلْيَسْتَعِذْ بِاللَّهِ مِنَ الشَّيْطَانِ ثَلَاثًا وَلْيَتَحَوَّلْ عَنْ جَنْبِهِ الَّذِي كَانَ عَلَيْهِ) رواه مسلم 2262

عن أبي هريرة قال : قال النبي صلى الله عليه وسلم : (... فَإِنْ رَأَى أَحَدُكُمْ مَا يَكْرَهُ فَلْيَقُمْ فَلْيُصَلِّ وَلا يُحَدِّثْ بِهَا النَّاسَ ) رواه مسلم 2263

عَنْ جَابِرٍ عَنْ رَسُولِ اللَّهِ صَلَّى اللَّه عَلَيْهِ وَسَلَّمَ أَنَّهُ قَالَ لأَعْرَابِيٍّ جَاءَهُ فَقَالَ : إِنِّي حَلَمْتُ أَنَّ رَأْسِي قُطِعَ فَأَنَا أَتَّبِعُهُ ، فَزَجَرَهُ النَّبِيُّ صَلَّى اللَّه عَلَيْهِ وَسَلَّمَ وَقَالَ : ( لا تُخْبِرْ بِتَلَعُّبِ الشَّيْطَانِ بِكَ فِي الْمَنَامِ ) رواه مسلم 2268

عَنْ أَبِي سَلَمَةَ قَالَ كُنْتُ أَرَى الرُّؤْيَا أُعْرَى مِنْهَا غَيْرَ أَنِّي لا أُزَمَّلُ حَتَّى لَقِيتُ أَبَا قَتَادَةَ فَذَكَرْتُ ذَلِكَ لَهُ فَقَالَ سَمِعْتُ رَسُولَ اللَّهِ صَلَّى اللَّه عَلَيْهِ وَسَلَّمَ يَقُولُ : ( الرُّؤْيَا مِنَ اللَّهِ وَالْحُلْمُ مِنَ الشَّيْطَانِ فَإِذَا حَلَمَ أَحَدُكُمْ حُلْمًا يَكْرَهُهُ فَلْيَنْفُثْ عَنْ يَسَارِهِ ثَلاثًا وَلْيَتَعَوَّذْ بِاللَّهِ مِنْ شَرِّهَا فَإِنَّهَا لَنْ تَضُرَّهُ ) رواه مسلم 2261

معنى كده ايه ؟؟؟؟؟؟
ان ماينفعش نشوف حلم وحش ونحكيه لحد

ماينفعشى خالص

ياريت نسمع الكلام بقاااااا

احنا كده هنكون بنخالف كلام الرسول عليه الصلاة والسلام

طب وبعدين ؟؟

وبعدين نعمل ذى ماهو موجود فى الاحاديث

- نبصق على يسارنا ثلاث
- ونستعيذ بالله من شرها
- ونغير الجنب اللى كنا نايمين عليه ،
- ومستحب اننا نقوم نصلى ركعتين لله

طب هى كده هتضرنا ؟؟؟؟؟؟
لأ .......... لأن ده كلام الرسول
الرسول قال ايه ؟؟؟
فإنها لن تضره

يبقى احنا لما نحلم حلم وحش نتبع الخطوات اللى فاتت
ونتأكد انها لن تضرنا

أوكيههههه ؟؟؟

نيجى بقا للمرحلة اللى بعدها

اللى هى إيه ؟؟؟؟
الاخت اللى كتبت حلمها خلاص وواحدة دخلت فسرتهولها على انه حاجة وحشه
هل ده شرط انه يتحقق ؟؟؟؟؟؟

هقولها لأ
طب ليه ؟؟؟؟؟
لأن الكابوس من الشيطان
والشيطان بطبعه كذوب
انما الرؤية من الله ...... والله صادق وعده ان صدقت الرؤيا

بس لو رجعنا كده للحلم اللى فسرته السيدة عائشة
هنلاقى السيدة اللى راحت تسألها على تفسير الحلم غلطانه
لأنها حكته وطلبت تفسيره
والسيدة عائشة غلطت لأنها فسرتهولها ...... حتى لو كان تفسيرها صح

غلطانة ليه ؟؟؟؟؟؟؟؟

هنقول عشان بشروا ولا تنفروا

ونفهم برده من القصة ان الكابوس او الحلم الوحش ده ماتحققش غير لما اتحكى واتفسر
انما لما الرسول فسره غلط الحلم ماتحققش

أوكيه ؟؟؟؟؟؟

انتظرونى
ثوانى ورجعالكم

**كتكوته** · 06-18-2010, 08:53 PM

نكمل موضوعنا بقا
وهو الرؤية

تعالو نشوف الاحاديث دي وبعدين نتكلم :
إِذَا رَأَى أَحَدُكُمُ الرُّؤْيَا يُحِبُّهَا فَإِنَّهَا مِنَ اللَّهِ فَلْيَحْمَدِ اللَّهَ عَلَيْهَا وَلْيُحَدِّثْ بِهَا
من رأى رؤيا حسنة فلا يُحدِّث بها إلا من يُحب ، ومن رأى رؤيا سيئة فعليه أن يستعيذ بالله من شرِّها فإنها لا تضره

نفهم إيه من الكلام ده ؟؟؟؟؟

اول حاجة .... ان الرؤيا بتكون حلوة .... واحنا بنصحا واحنا حابينها ( مش مقبوضين منها )
مع ان فيه رؤيا بتكون انذار او تحذير من الله عز وجل ..... بس بتختلف عن الكابوس .... لأن الكابوس بيكون حدوث مانكره
انما التحذير فى الرؤيا بيكون مختلف ،

زى إيه ؟؟؟؟

هقولكوا

زى الحلم اللى حلمه الملك وطلب التفسير بتاعه
واللى فسره سيدنا يوسف عليه السلام
الحلم ده كان تنبيه ببعض الاحداث المستقبليه عشان يحتاطوا وياخدوا حذرهم

تانى حاجة ..... اننا لما نشوف رؤية حلوة مانقولهاش لأى حد

امال نقولها لمين ؟؟؟

نقولها للناس اللى بنحبهم وبيحبونا

يعنى ماشوفش رؤية حلوة امبارح وانا بقا عارفة ان جارتى مابتحبنيش ..... واقول برده اما اروح احكيهالها
وانا طبعا زى الهبلة وباحكيلها

وهى تسمع الرؤيا وتتغاظ !!

طب لزمته إيه ياحاجة ؟!

انتى راحة تفرحيها ولا راحة تغيظيها وتخليها تضايق ؟؟!

يبقى لما نشوف رؤية حلوة نهدا كدا ،

ومنقعدش نحكيها للناس كلها

أوكيه ؟؟؟؟؟

طيب هو فيه حاجة كمان تقولنا ازاى نتأكد ان حلمنا ده رؤية ؟؟؟؟

احنا لغاية هنا بقا وممكن نختلف
لان القرأن والسنة كان واضح فى التقسيم والتوضيح

انما شروط الرؤيا مكانشى واضح غير هذا الشرط :

وَأَصْدَقُكُمْ رُؤْيَا أَصْدَقُكُمْ حَدِيثًا

انما باقى الشروط اختلف فيها العلماء زى مثلا ميعاد الرؤيا

انما ممكن نقول
ان عادةً الرؤية لما بنصحا بنكون فاكرينها
وان عادةً برده الرؤية بتكون قصيرة

يعنى مش واحدة جاية تحكيلنا فيلم هندى كده وتكتبهولنا فى صفحتين وطالبة التفسير

وبرده بتختلف الرؤية من شخص للتانى

ازاااى ؟؟؟؟؟

يعنى ممكن واحدة تكون احلامها بتحقق زى ماهى
من غير تفسير

وواحدة احلامها عبارة عن رموز

والرموز نفسها طبعا بتختلف من شخص للتانى
يعنى ممكن اتنين يحلموا نفس الحلم
بس التفسير يختلف

طب نقول مثال تانى للفرق بين الرؤية وحديث النفس
والمثال ده مخصوص عشان خاطر عيون الانوثة الغامضة

لو قولنا واحدة حلمت خير اللهم اجعله خير انها اشترت خاتم ذهب
- لو الست ديه حامل ...... هنقولها نعتقد والله اعلم ان المولود ذكر
- طب لو الست ديه جوزها قايلها هايجيبلها خاتم هدية ...... يبقى حديث نفس
ليه ؟؟؟؟؟
لأن واحدة نفسها فى خاتم وقاعدة تفكر فيه وبعدين طبيعى انها تحلم بيه
وعادة برده الرؤية بيكون فيها رموز واضحة ..... زى اللى بتحلم انها راكبة عربية مع خطيبها
يبقى التفسير هنا ...... هنقول نعتقد والله اعلم ان الزواج هيتم ،

طب بالنسبة للى بتفسر
هل معنى انها فسرت حلم صح ان كل تفسيراتها صح ؟؟؟؟؟

طبعا لأ

واحنا لازم نعرف حاجة مهمة برده
حتى لو فسرت صح
الرؤيا ممكن تصدق وممكن لأ
يعنى مش شرط تتحقق

طب احنا عايزين الرؤية بتاعتنا تتحقق

نعمل ايه ؟؟؟؟

نتبع كلام الرسول عليه الصلاة والسلام
وَأَصْدَقُكُمْ رُؤْيَا أَصْدَقُكُمْ حَدِيثًا
يعنى لازم نصدق فى كلامنا عشان ربنا يكرمنا برؤي صادقة وبشرى من الله عز وجل

وفى الاخر احب اقولكوا على حاجة مهمة
لا يعلم الغيب الا الله

يارب يكون الموضوع مفيد
ويكون عجبكوا
وماتنسوش التقيييييييييييييم

**عيون القلب** · 08-22-2010, 03:58 AM

تسلم ايدك يا كتكوته بجدموضوع جميل

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الألوان في علــم النفس	كتكوته	البيت بيتك	9	08-02-2009 03:48 PM
حاجه كده تفتح النفس بجد	كتكوته	قسم الديكورات والاثاث	1	05-15-2009 05:44 PM
ديكووووووورات تفتح النفس على الاكل	كتكوته	قسم الديكورات والاثاث	2	02-22-2009 07:31 PM
ماالفرق بين عزة النفس والغرور	اميرة الاحزان	سرك فى بييييييييييير	0	10-23-2008 04:44 PM
كلمات لها اثر على النفس	اميرة الاحزان	البيت بيتك	12	08-16-2008 10:33 AM